"პროგრამა, ჯერ დაგეგმვის თვალსაზრისით, ძალიან საჭირო, დროული და კარგია. ყოველთვის დიდი მოთხოვნა იქნება მასზე, მთავარია შენ გქონდეს დრო და ენერგია, თინი, ამას ამდენი დრო დაუთმო, თორემ ეს healing თერაპია ქართულ სოციუმს დიდი ხანია ძალიან სჭირდება..

უამრავი ადამიანის ერთ ჯანსაღ სივრცეში უკეთესობისკენ ცვლილების იდეით გაერთიანება ფიზიკურად ვერ იქნება რამე სხვა, რაც არ ნიშნავს დადებითს და საუკეთესოს.

მომწონს როგორც დგება პროგრამა, როგორც მუშაობს, როგორც იგეგმება და რომ არის კანონზომიერი, თითქოს, მიჰყვება თავის რუტინას, ლოგიკურ და სწორ დინებას, რომელსაც ისღა აკლია, შენ აჰყვე.

პროგრამამ მომცა ბედნიერება. საკუთარ თავთან მხნედ და მხრებგაშლით დაბრუნების შესძლებლობა.

მაჩუქა ჩემი თავი, რომელიც სულაც არ ყოფილა საზიზღარი, ძალიან კარგი ტიპიც კი გამოვიდა სადღაც.

ვაპატიე საკუთარ თავს და მან მე მაპატია ყველაფერი.

მომცა საკუთარ თავთან, საკუთარ სულთან და გულთან დაბრუნების მხნეობა.

მაჩუქა სამყარო, რომელშიც ვცხოვრობ და ეს სამყარო ბედნიერებითაა სავსე.

მომცა ფერები, რომლითაც გარემოს და ადამიანებს აღვიქვამ.

მომცა ხმის დამწევი, როცა ფიქრები ხმაურობენ, მედიტირების ჩვევა და ხმაურში ჩემი თავის უცებ პოვნის ტექნიკა.

მომცა თავდაჯერება, ზომიერების განცდა, მომიხსნა უამრავი შიში.

მომცა შეცდომების უფლება, yeeesss, არ ტეხავს, შემიძლია დავუშვა და მათზე ვისწავლო ისე, რომ ამან უახლოესი 4 წელი არ მომიშხამოს.

გამაშვებინა ხელი კოშმარ ფიქრებზე, ჩაბღაუჭებული რომ მყავდა.

თავიდან მაჩუქა ჩემი საყარელი ადამიანები, მათ უკვე ვხედავ ჩემი ლანდების მიღმა, მაჩუქა ჩემი ქვეყანა, სოციუმი, რომელიც არ ყოფილა შეუფერებელი. დამანახა საკუთარი უნარები და თვისებები, რომელიც არასაკმარისი ან დაგვიანებული კი არაა, დროულია, საჭირო და მისაღები.

მაჩუქა უსაყვარლესი ადამიანები პროგრამიდან თავიანთი პრობლემებით, თავიანთი ფიქრებით და ემოციებით, რაც მათ კიდევ უფრო ადამიანურს, საყვარელს და გასაგებს  ხდის ჩემთვის.

შემახედა მილიონი რამისთვის სხვა ადამიანების თვალებით.

ავტორიტეტები ჩამოვიდნენ კვარცხლბეკებიდან.

მაჩუქა სიმშვიდე და თავდაჯერება.

მაჩუქა საკუთარი თავის სინდისის ქენჯნის გარეშე განებივრების უფლება.

მომცა უფლება, ვიცხოვრო.

(ყველაფერი აკრძალული მქონდა, სიცილიც, ბედნიერებაც, სიყვარულიც, წარმატების სურვილიც, ნდობაც.. რა ვიცი, ყველაფერი ადამიანური. მეშინოდა მძაფრი გრძნობების, მეშინოდა ხვალინდელი დღის).

რეკომენდაციას გავუწევდი ამ ყველაფრის გამო და კიდევ იმიტომ, რომ შენ ხარ ასეთი. შენთან გაჟღერებული სტრესული ფიქრიც კი უკვე ნახევარ ძალას ჰკარგავს. არ ვაჭარბებ.

ვიცი, რომ ყოველთვის გაქვს გზა, ფიქრების გზა, სწორი ფიქრების, არაერთი, მილიონი, რომელიც ნამდვილ გამოსავალთან მიმიყვანს.

ჩემი ცხოვრება ამ პროგრამამდე იყო ძალიან სტრესული, სავსე აზრებით, ფიქრებით, მოლოდინებით და განცდებით, რომ არაფერი არ არის კარგად, ყველაფერზე დასტურს ან უარყოფას ვეძებდი ჩემს გარეთ, სხვებისგან.

ამ პროგრამაში მომიყვანა ზუსტად ამ ფიქრებით ატეხილმა გაუსაძლისმა ხმაურმა. ვიცოდი, რომ ეს უნდა შემეწყვიტა. ეს უნდა დამთავრებულიყო.

ასე ცხოვრება აღარ შემეძლო, სტრესი და სტრესი, ერთმანეთზე დართული, ერთი მეორეზე უფრო ძლიერი.

ყველა მორიგი დარტყმა მიწას მაცლიდა ფეხებიდან და დიდი ენერგიის ფასდ ვდგებოდი.

ვგრძნობდი და უკიდურესად განვიცდიდი სხვების ემოციებს, ვახმიანებდი მათ ფიქრებს, ბევრს ვფიქრობდი იმაზე, როგორ და რა უნდა ეფიქრათ მათ ჩემზე,  ვრეაგირებდი ყველა იმპულსზე, რომელსაც მიგზავნიდნენ, ზღვარი მქონდა წაშლილი მათ ქმედებას და ჩემს ტერიტორიას შორის. სამყაროს ტვირთი მეკიდა მრებზე.

პროგრამის მერე ვარ თავისუფალი, ბედნიერი, წარმატებული ადამიანი. ყველაფერი შემიძლია და გამომივა, ყველაფერი კარგად მაქვს და მექნება.

აღარ ვებუტები სამყაროს, რომელიც ყოველთვის უზომოდ გულუხვი იყო ჩემდამი.

მართლა უზომოდ გულუხვი იყო, რაზე ოცნებაც კი გავბედე, ასმაგი მომცა.

ახლა ისღა დამრჩენია, ვიოცნებო და როგორც მიყვარს ხოლმე, თან დავგეგმო შემდეგი ნაბიჯები."

"პროგრამა “საკუთარ თავთან ჰარმონიაში”  მომწონს რომ ის არის ნამდვილად ის, რაც ყველას ჭირდება, ერთიანი კომპლექსური პროგრამა, რომელიც გასწავლის საკუთარი თავის სიყვარულს, აღიარებას, სხვების მიმღებლობას, მადლიერებას და ჰარმონიას საკუთარ თავთან.

პროგრამა ემსახურება საკუთარი თავის შეცნობას, რეალობის რეალურად აღქმას და წარსულისგან გათავისუფლებას. მომწონს ძალიან, რადგან მარტივი 4 კითხვის და 3 შებრუნების შედეგად შეგიძლია იმოგზაურო საკუთრი თავის ბნელ ლაბირინთებში და შიგ შუქი შეიტანო.

თავიდან თითქოს რთული ჩანს მაგრამ თუ თქვენი გაცნობიერებების დრო მოვიდა და მზად ხართ საკუთრ თავზე აიღოთ პასუხისმგებლობა - ეს პროგრამა ნამდვილად თქვენთვისაა და ძალიან დიდი სამსახურს გაგიწევთ. ეს პროგრამა მაძლევდა და მაძლევს ძალას რომელიც ამდენი ხნსი განმავლობასი დაკარგული მქონდა და ვერც კი ვგრძნობდი, რომ ეს ჩემში იყო და გარეთ ვეძებდი.  აი სწორედ ამ ძალის აღმოჩენაში დამეხმარა, საოცრად გამაძლიერა და განმავითარა.

ჩემი ცხოვრება ამ პროგრამამდე იყო მოსაწყენი, უღიმღამო, უსიყვარულო რეალური სიყვარული რა იყო ვერ ვხვდებოდი. პროგრამის შემდეგ კი, პირიქით ეს ყველაფერი სწორად აღვიქვი და ჩემი ცხოვრების ფერებიც შეიცვალა და გახალისდა. ძალიან დიდი ძალები გამოთავისუფლდა ჩემში და საკუთარი თავის რწმენა დავიბრუნე, ასევე აღიარება და იარლიყების გარეშე დავიწყე საკუთარი თავის მიღება და შეყვარება. "

"ეს პროგრამა არის განვითარების და საკუთარ თავთან დამეგობრების ძალიან კარგი ინსტრუმენტი. ყველა მოდული ისეა არჩეული და დაგეგმილი, თითქოს ვიღაცამ შენი ფიქრები წაიკითხა და ზუსტად იცის, რაზე გაქვს სამუშაო, რა საკითხები გაქვს გონებაში და გულში გადასამუშავებელი, რა საკითხების გამო გჭირდება ჩაუღრმავდე შენ თავს და გაანეიტრალო ის, რაც სულ გაწუხებდა.

რადგან ეს პროგრამა ანონიმურია, საშუალება გაქვს ისაუბრო ნებისმიერ საკითხზე. აქედან გამომდინარე, ხარ ძალიან გულწრფელი და არ ფიქრობ იმაზე, როგორ შეალამაზო და შეცვალო შენი სათქმელი სამუშაო პროცესისას. თანაც ძალიან საინტერესოა, როცა პროგრამის სხვა წევრებს პირადად არ იცნობ, მაგრამ ისეთ ამბებს უზიარებ, რომელიც გონების ერთ კუთხეში საგულდაგულოდ ჩარაზული გქონდა. ამ დროს კი, ამ უცნობი ადამიანებისგან იღებ უპირობო მხარდაჭერას.

ამ პროგრამაში ჩართვის დროს ვიყავი ძალიან აფორიაქებული. თინისთან რამდენიმე ინდივიდუალური სესია მქონდა კონკრეტულ საკითხზე ახალი გავლილი და ვგრძნობდი, რომ არ მინდოდა შემეწყვიტა ეს საოცარი და ჩემთვის ახალი პროცესი. ამ დროს წავიკითხე პროგრამის შესახებ და დავასკვენი: ეს მოდულები ზუსტად საჩემო იყო. მთელი ცხოვრება მიჭირდა გადაწყვეტილებების მიღება. ვეკითხებოდი აზრს ყველას და მერე ძლივს ვიღებდი თვითონ. თუმცა რაც უფრო მეტს ფიქრობ, მით უფრო მეტად იბნევი და ბოლოს აღარაფერს აკეთებ.

პროგრამაში ჩართვისას, ჩემი მე მომავალში დავინახე ისეთი თავდაჯერებული, რომელიც საკუთარ თავს ბოლომდე ენდობა. საკუთარი თავის საუკეთესო მეგობარია და აქედან გამომდინარე აღარც მილიონჯერ ატრიალებს ერთიდაიგივე საკითხს აქეთ-იქეთ, უბრალოდ ინსტიქტს და ინტუიციას ენდობა. ვგრძნობ, რომ ამ საკითხში ძალიან დიდი ნახტომი მაქვს. აქედან გამომდინარე კი ნაკლებად ვფორიაქობ ყოველ წამს გაურკვეველ რაღაცეებზე.

მე დღეს უფრო მეტად მსიამოვნებს ჩემ თავთან ურთიერთობა. თითქოს უფრო კარგად გავიცანი ჩემი მე და დავუმეგობრდი მას. ბევრად ხშირად ვუღიმი მას, ვტკბები მომენტებით და ეს ძალიან მომწონს. მინდოდა მომავალში უპირობოდ მყვარებოდა ჩემი თავი და ნაკლებად გამეკრიტიკებინა ის. აქაც დიდი ნაბიჯები გადავდგი, რამაც შინაგანი სიმშვიდე მომიტანა;

და ყველაზე მთავარი: ახლა მე უკვე ვიცი, როგორ ვიმუშაო ჩემ თავთან. ვიცი,როგორ შემიძლია მოვუსმინო და დავეხმარო მას."

"ეს პროგრამა მომწონს იმიტომ, რომ არის ხანგრძლივი და ინტენსიური, კიდევ იმიტომ, რომ ცხოვრებაში მნიშვნელოვან ყველა ასპექტს მოიცავს.

მომწონს იმიტომ რომ აქ არის უპირობო მიმღებლობა და უამრავი ადამიანი, რომელიც ჩემსავით ცდილობს გაერკვეს საკუთარ თავში, ჩემსავით მუშაობენ და უდიდესი მხარდაჭერის და სიყვარულის წრეა, სადაც თუ მოხვდი შეუძლებელია შენც იგივე არ იგრძნო, იგივე არ გააკეთო სხვების მიმართ.

და კიდევ, ძალიან მნიშვნელოვანია თვითონ ეს მუშაობის სტილი, „სამუშაო“, ძალიან ძლიერი დავალებები, ტელეკლასები სადაც სხვების პარალელურად შემიძლია ვიმუშაო და ბევრჯერ აღმომიჩენია ისეთი ფიქრი რომელიც მე არ მქონდა ცნობიერში და ალბათ არც ვიმუშავებდი სხვებს რომ არ გაეჟღერებინათ.

რეკომენდაციას ვუწევ ამ პროგრამას, როგორც სიყვარულის და მხარდაჭერის სივრცეს.

ამ პროგრამამ მომცა ტოლერანტობა, მხარდაჭერა, უპირობო მიმღებლობა, სიყვარულის უდიდესი ძალა, დამანახა რომ მარტო არ ვარ. გამოცდილება, მეგობრობა, ლოიალობა.  თითოეულ მონაწილესთან ერთად ეს პროგრამა ხდება ცოცხალი ორგანიზმი, რომელიც სიყვარულს ასხივებს და სულ უფრო და უფრო იზრდება, მეტად ანათებს, კაშკაშებს და ათბობს ყველას ვინც მასთანაა.

ამ პროგრამაში მივიღე ცოდნა, გამოცდილება როგორ ვიმუშაო საკუთარ თავზე დამოუკიდებლად, ანუ აღარ ხარ დამოკიდებული მუდმივად სხვაზე, თვითონ სწავლობ, იძენ ინსტრუმენტს რომელიც ნებისმიერ წამს შენთანაა და მზადაა შენს დასახმარებლად.

ამ პროგრამამდე ვიყავი ადამიანი, რომლის სქესის პირობითი იყო, ვერ ვაძლევდი უფლებას ჩემს თავს ვყოფილიყავი გოგო, ქალი, ვიყავი უამრავ ფიქრში, ისტორიაში, რწმუნებულებებში გახვეული, სქლად მეცვა გარშემო ეს ფენა, ისე სქლად რომ აღარ ჩანდა ვინ იყო ამ ყველაფრის მიღმა, მუდმივად მოუხერხებლად და დისკომფორტში ვგრძნობდი თავს ამის გამო, ვიტანჯებოდი, არ ვიცოდი ვინ ვიყავი, აღარც კი მახსოვდა რეალურად როგორი ვიყავი..

ამ პროგრამის შემდეგ მე გავიხადე ეს სქელი ქურქი, დავინახე გოგო, რომელიც იყო ბავშვი და მე ამ ბავშვს შევურიგდი, ახლოს გავიცანი, დავუმეგობრდი და ამავე დროს ვარ ქალი, რომელიც მშვენიერია და ყველაფერს საუკეთესოს იმსახურებს, მსუბუქად ვარ, ნამდვილი ვარ, ვაგრძელებ საკუთარი თავისთვის მუშაობას ფიქრებზე. აქ და ამჟამად ცხოვრებას ვსწავლობ, ძალას და სიმყარეს ვგრძობ ჩემში, შინაგანი ღიმილი მეტყობა სახეზე, ჩემი სხეული უფრო მოქნილია, უფრო ლაღია, უფრო დახვეწილია.

არ ვიცი რა ეშველებოდა ამ გოგოს მე რომ ამ პროგრამაში არ ჩავრთულიყავი, როგორ იქნებოდა დღეს, კიდევ რამდენ უარყოფით ფიქრს დაიმატებდა და მიიწებებდა უარყოფით იარლიყებს, ასე ნელ-ნელა გადაიქცეოდა ფიქრების გროვად და სამყაროში კიდევ ერთი ადამიანი ტანჯვაში გაატარებდა ცხოვრებას, მაშინ როცა სამყაროს სულაც არ სჭირდება ეს მსხვერპლი ჩვენგან, მაშინ როცა ის მხოლოდ ჩვენს დახმარებას ცდილობს  და საკუთარ თავთან დაბრუნებაში გვეხმარება. მიხარია რომ ვარ, აქ ვარ და ასეთი ვარ."

"პროგრამა "საკუთარ თავთან ჰარმონიაში" იყო შანსი, რომ ცხოვრება თავიდან დამეწყო. პროგრამამდე ჩემი ცხოვრება ძალიან ჩვეულებრივი, იმედგაცრუებებითა და ტკივილებით სავსე იყო, ვერ ვაცნობიერებდი თუნდაც იმას, რომ მზის ამოსვლისთვისაც შეიძლება მადლიერი ვყოფილიყავი, სამყაროს აღვიქვამდი, როგორც მტერს.

ამ პროგრამაში მონაწილეობის შემდეგ გავხდი თავდაჯერებული, დავიწყე ჩემი თითოეული ქმედების დაფასება, მადლიერების გამოხატვა.

ამ პროგრამამ მომცა უამრავი გაცნობიერება, დავიბრუნე ძველი ურთიერთობები, დავიწყე წინ გაბედული და მყარი ნაბიჯების გადადგმა, ვირწმუნე საკუთარი თავის და შესაძლებლობების.

პირადი ურთიერთობა მოვაგვარე. ჩემს მშობლებთან ურთიერთობას შევხედე სხვა თვალით და სულ სხვანაირად დავინახე ისინი.

ამ პროგრამამ მომცა სულიერი სიმშვიდე, სიმტკიცე, რწმენა, მიზნები, გაცნობერებები.
მე და სამყარო მეგობრები გავხდით."

პროგრამა მომწონს ჯგუფის წევრების მხარდაჭერის გამო. პროგრამის არსის გამოო. თინის და კურატორობის გამო. ანონიმურობის გამო. ჩემს მიერ მიღებული შედეგის გამო.

ეს პროგრამა მაძლევს ადგილს, სადაც შემიძლია ნებისმიერი რამ დავწერო და ყველასგან დადებითი უკაკვშირი მივიღო. ეს პროგრამა მაძლევს საშუალებას დავუბრუნდე ჩემს თავს. ამ პროგრმამ შემიფარა ჩემი ცხოვრების ყველაზე სტრესულ სიტუაციაში და არა მხოლოდ შემიფარა, იქიდან გამომიყვანა.

პროგრამას რეკომენდაციას გავუწევდი ჩემ მიერ მიღებული შედეგების გამო, იმიტომ, რომ ეს პროგრამა ერთ-ერთი საუკეთესოა გარშემომყოფებთან და საკუთარ თავთან ჰარმონიაში მოსასვლელად. იმიტომ, რომ მას ყავს შესანიშნავი თინი, კურატორები და ბაირონ ქეითის სამუშაო.

ჩემი ცხოვრება პროგრამამდე შავი ხვრელი იყო და ახლა კი მსოფლიოს ნათელი წერტილი გავხდი. ასე მინდა დავახასიათო ჩემი ცხოვრება.